Счетчик посещений ГАПОУ РС(Я) ЯПТ им. Т.Г Десяткина

ҮЛЭ ГЕРОЯ ТАРААС ДЕСЯТКИН ААТЫНАН ТЕХНИКУМ ЭДЭР ЫЧЧАТЫ ҮӨРЭХХЭ ЫҤЫРАР

09.07.2020

Билиҥҥи ыксаллаах быһыы-тутуу көрдөрдө, ким ханнык да балаһыанньаҕа айаҕын ииттинэр кыахтааҕын. Оҥорон таһаарар идэлээх дьон: сыбааркаһыттар, туокардар, силиэсэрдэр үлэтэ суох судаарыстыба уунар көмөтүн кэтэспэттэр, үлэлии-хамсыы сылдьаллар.

Улэ Геройа Тараас Десяткин аатынан Дьокуускайдааҕы бырамыысыланнай техникумҥа  тохсус кылаас кэнниттэн: туокар, сыбааркаһыт-сантехник, электромонтажник, көмүс ууһа; уон биир кылаас кэнниттэн: алмаас кырыылааччы, электростанция, гаас тэрилин, хонтуруоллуур-кээмэйдиир прибордары өрөмүөннүүр силиэсэр, С категориялаах суоппар идэлээх тыраахтары өрөмүөннүүр маастар, сыбааркаһыт идэлэрин баһылыахха сөп.

СТАНИСЛАВ ХРИСТОФОРОВ салайааччылаах техникум кэлэктиибин үлэтин түмүгэ -устудьуоннар сыл аайы дойдуга ыытыллар «Молодые профессионалы (WorldSkillsRussia)» күрэххэ бириистээх миэстэҕэ тиксэллэр, өрөспүүбүлүкэ чиэһин көмүскүүллэр. Ол курдук көмүс уустара ЕГОР ФЕДОРОВ, ГЕННАДИЙ ГАВРИЛЬЕВ, күндү тааһы кырыылааччылар АЛИНА ГРИГОРЬЕВА, САИДА ВАСИЛЬЕВА, сыбааркаһыт АНДРЕЙ ЯНЫГИН дойдуга бу хамсааһын кыайыылаахтарын үрдук аатын сүктүлэр. Быйыл бэйэ үбүлэнии суотугар аатырбыт KEMPPI фирма полуаптаамат уонна аргонунан сыбааркалыыр аппараттарын ылан сыбааркаҕа уһуйуу өссө үрдүк таһымнаах буолуо диэн эрэл баар. Дизайн лабораториятыгар компьютерга 3-D моделлаах прототиптары оҥорууга ким баҕалаах үөрэнэр. Көмүс ууһун, алмаас кырыылааччы, электриктэр, сантехниктэр сыахтара саҥа идэлээх үлэ тэрилинэн, станоктарынан толору хааччыллыннылар. Кэлиҥҥи икки сылга устудьуон олорор уопсайыгар, үөрэх куорпуһугар өрөмүөн барда. Дьокуускай куорат дьаһалтата көҕүлээһиннээх “Норуот бүддьүөтэ” бырайыакка кыттан техникум быйыл Үлэ Геройа Тараас Десяткин аатынан скверы үлэҕэ киллэрдэ.Чугас олохтоох дьон манна кэлэн кэлээскилээх оҕолорун кытта дьаарбайар, кэрэ көстүүлээх ыскаамыйыларга олорон сынньанан сэһэргэһэр сирдэрэ Бырамыысыланнай уокуругу биллэ киэргэттэ. Аттыгар турар спорт былаһааккатыгар уолаттар футбол оонньууллар.

Араас сылларга техникуму бүтэрбит билигин үлэлии-хамсыы сылдьар эдэр дьону кытары кэпсэттибит. “Техникуму кыһыл дипломунан бүтэрбитим. Электрик үөрэҕэр үөрэммиппин отой кэмсиммэппин. Былырыын “Якутскэнерго” уонна уонна “Сахаэнерго” хампаанньалар кэлэктииптэрин икки ардыгар ыытыллыбыт күрэххэ кыайан “2019 сыл бастыҥ электромонтерун” аатын ылбытым. Ийэм да, бэйэм да маастарбар НАТАЛЬЯ СЕРГЕЕВНА ЕРМАКОВАҔА мэлдьи истиҥник махтана саныыбыт. Билигин ипотекаҕа дьиэ ыллыбыт, кэргэмминээн икки оҕобутун иитэбит. Быйыл кэтэхтэн инженер-электрик үөрэҕэр туттарсар былааннахпын,”- диэн кэпсиир Якутскэнерго Покровскайдааҕы РЭС электромонтера ВАЛЕРИЙ ИВАНОВ.

ДАНИЛ ДЬЯКОНОВ уонна АЙЫЫНА ИВАНОВА ГРЭС-2 тэрилтэҕэ үһүс сылын үлэлииллэр. Данил Дьяконов: «Биһиги бу тэрилтэҕэ конкурсу ааһан хонтуруоллуур-кээмэйдиир прибордары өрөмүөннүүр силиэсэринэн киирбиппит. Билигин  мин үрдээн дьуһуурунай силиэсэр эбээһинэһин толоро сылдьабын. Билигин пандемия буолан хонтуруол баһаам, күн аайы доруобуйа туругун бэрэбиэркэлииллэр. Үлэҕэ киириибитигэр эдэр исписэлиистэргэ көмөлөһөн 203 микрорайоҥҥа дьиэ биэрбиттэрэ. Үлэбитигэр автобус таһар. Былааҥҥа салгыы кэтэхтэн үөрэнэн инженер буолуох баҕа баар. Сотору-сотору үлэ харыстабылын, идэбитинэн билиибитин бэрэбиэркэлииллэр. Үстэ туттарбатах дьон үлэттэн бараллар.  Ирдэбил манна кытаанах, үлэ тэрилэ кэми кытта сайдан иһэр, онон быыһа суох билиини хаҥаттар булгуччулаах.  Саҥа үөрэххэ туттарсар дьоҥҥо этиэм этэ, билии наада диэн, эрдэттэн быһаарынан, идэни талан үөрэҕи ылар ордук». Айыына: “ Техникумҥа үөрэммит кэмнэрбин күндүтүк саныыбын: бэйэбит электросхема хомуйарбытын, техникумҥа ыытыллар тэрээһиннэри. Маастардарбар ТУЙААРА ИВАНОВНА АРТАХИНОВАҔА, ПАВЕЛ ВАСИЛЬЕВИЧ ЗАХАРОВКА хаһыат нөҥүө махталбын тиэрдэбин.”

Былырыын Арассыыйаҕа сэттиһин ыытыллыбыт аан дойдутааҕы WorldSkills хамсааһын «Эдэр профессионаллар” чөмпүйэнээт финалыгар «Сварочные технологии» кэмпитиэнсийэҕэ «За профессионализм» бэлиэ кыайыылааҕа АНДРЕЙ ЯНЫГИН Транснефть-Восток хампаанньаҕа сыбааркаһытынан үлэлиир: “Эдэр киһи бэйэтэ үлэҕэ баҕалаах буолуохтаах, оччоҕо эрэ санаабыт санааҕын ситиһиэххэ сөп. Мин билигин да билбэтим-сатаабатым элбэх, онон уоппуттаах үлэһиттэртэн эбии үөрэнэн бу тэрилтэҕэ өссө да үлэлиир былааннаахпын. Маастарбар ФЕДОР ВИКТОРОВИЧ ШКУЛЕВКА махталым улахан. Кини күн аайы үөрэтэн-такайан, сыбаарка араас көрүҥүгэр дэгиттэр гына иитэн билигин сарсыҥҥы күммэр эрэллээхпин,  дьоһун идэлээхпин,”- диэн WhatsApp нөҥүө суруйар. Хочу такой сайт

Ити курдук, Дьокуускайдааҕы бырамыысыланнай техникуму бүтэрбит үлэ дьоно төрөөбүт түөлбэлэрэ сайдарыгар күүс-көмө буолаллар, эдэркээн оҕолор олохторун оҥостоллор.

Бу ый 20-тэн идэҕэ уһуйар үөрэх тэрилтэлэрэ үөрэххэ ылар хамыыһыйалара үлэлэрин саҕалыыллар. Коронавирус дьаҥа сатыылаан, төрөппүттэр да, оҕолор да хайдах быһыылаах быйыл үөрэххэ туттарсыахха сөбүн туһунан билэ-көрө сатыыллар. Дьокуускайдааҕы бырамыысыланнай техникум эмиэ саҥа усулуобуйаҕа абитуриеннары саайт, электроннай буоста нөҥүө докумуон туттаралларын кэтэһэр.

Просмотров всего: , сегодня:

Рейтинг: . Оценили: .

Дата создания: 09.07.2020

Дата обновления: 09.07.2020

Дата публикации: 09.07.2020

Наверх
На сайте используются файлы cookie. Продолжая использование сайта, вы соглашаетесь на обработку своих персональных данных. Подробности об обработке ваших данных — в политике конфиденциальности.

Функционал «Мастер заполнения» недоступен с мобильных устройств.
Пожалуйста, воспользуйтесь персональным компьютером для редактирования информации в «Мастере заполнения».