Былыр-былыргыттан саха ааттаах биир киэн туттар дьоно – көмүс уустара үрүҥ көмүстэн оҥоробут киэргэллэрэ Париж куоракка буолбут Аан дойдуга ыытыллар быыстапкаларга кыттыыны ылбыттара биллэр. Билигин көмүстэн оҥоһуктар олох сайдан иһэрин тухары өссө ураты көстүүлэнэн, оҥоһуллар ньымалара уустугуран, эҥин араас таастарынан күлүмүрдээн хас биирдии омук бэйэтин кэрэҕэ тардыһарын бэлиэтэ буолан таас витрина нөҥүө атыылаһааччы кэрэ аҥардар болҕомтолорун тардаллар, ымсыырдаллар, угуйаллар. Омук быһыытынан илдьэ кэлбит саха норуотун уустук идэтигэр – көмүстэн уһаныыга өрөспүүбүлүкэ эдэр ыччатын Улэ Дьоруойа Тараас Десяткин аатынан Дьокуускайдааҕы бырамыысыланнай техникум үөрэтэр.

Быйыл күһүн саҥа үлэ-үөрэх дьылын көрсө улахан үөрүүлээх сонун техникум үлэһиттэрин сүргэлэрин көтөхтө. Көмүс ууһун идэтигэр үһүс кууруска үөрэнэр СЕРГЕЙ КАНАЕВ Уфа куоракка буолбут дойду  үрдүнэн ыытыллар IX «Молодые профессионалы (WorldSkillsRussia)» күрэххэ чөмпүйүөн үрдүк аатын ылла. JuniorSkills бырагырааманан эмиэ Ювелирное дело кэмпитиэнсийэҕэ кыттыбыт МАРИЯ ФИЛИППОВА боруонса мэтээлинэн наҕараадаланна. “Огранка ювелирных вставок” кэмпитиэнсийэҕэ  үһүс бириистээх миэстэҕэ ЛИЛИАНА ХРИСТОФОРОВА таҕыста.  Бу кыайыы элбэх сылга  көмүс ууһун идэтигэр уһуйбут маастардар АЛЕКСАНДР БЫСЫИН,   АЙЫСЕН АТЛАСОВ, ЛЮБОВЬ ДОРОГУНОВА элбэх сыраларын уурбут, 9 кылаас кэнниттэн кэлбит оҕолору үөрэппит-такайбыт үлэлэрин түмүгэ. Бу кыайыы да инниттэн техникум устудьуоннара дойду үрдүнэн ыытыллар күрэххэ 2017 сылтан өрүү бириистээх миэстэҕэ тиксэллэр. Ол курдук ЕГОР ФЕДОРОВ, АЛИНА ГРИГОРЬЕВА, ГЕННАДИЙ ГАВРИЛЬЕВ, САИДА ВАСИЛЬЕВА, АНДРЕЙ ЯНЫГИН, ЛЯЛЯ ТЕТИНА, ЯКОВ САННИКОВ араас сылларга үрүҥ көмүс уонна боруонса мэтээллэри, “За профессионализм” медальону өрөспүүбүлүкэ суотугар аҕаллылар.

“Мин маҥнайгы кууруска үөрэнэ киирээт техникум иһинэн ыытыллар күрэхтэһиигэ кыттан, маастардарым миигин бэлиэтии көрөн Ворлдскиллска бэлэмнэнэн барбытым. Түүннэри-күнүстэри, сүгүн утуйбакка-олорбокко дьарыктанан Арассыыйа үрдүнэн бастыҥ көмүс ууһун аатын ыллым. Бу кыайыыга тиийэрбэр чугас дьонум, учууталларым уонна маастардарым Александр Дмитриевич Бысыин, Айысен Павлович Атласов, Любовь Ивановна Дорогунова сүбэ-ама, күүс-көмө буолбуттара. Кинилэргэ махталым муҥура суох. Мин санаабар маннык күрэхтэргэ инникитин да кыттар оҕолорго сүбэлиэм этэ, сулбу-халбы быһаарыыны ылынар, аныгылыы эттэххэ креативнай толкуйдаах, холку, бэйэҕэр эрэллээх буолуохха наада. Билигин Шанхайга буолуохтаах Аан дойду күрэҕэр кыттар баҕабын ситиһээри күүстээх бэлэмнэнии бара турар. Сыыһа-халты син-биир баар, ону туоратар курдук маастардарым көмөлөрүнэн билигин улэлэһэ сылдьабыт.

 Кыра эрдэхпиттэн бултууру, балыктыыры сэргиир буолан, булт инспиэктэрэ буолар баҕалаах этим. Билигин үөрэхпин бүтэрдэхпинэ көмүс ууһун идэтинэн үлэлиир санаалаахпын», -  диэн кэпсээннээх буолла кыайыы аргыстаах, көмүс илиилээх көмүс ууһа СЕРГЕЙ КАНАЕВ.

Устудьуон олоҕо үөрэҕинэн эрэ муҥурдаммат. Эдэр дьон быһыытынан бэйэлэрин холунан көрөр, тэҥнээхтэриттэн хаалсыбат буолар санаа кинилэргэ өрүү баар. Спорт эдэр киһи эрэллээх аргыһа. Быйыл техникум устудьуоннара спортка үрдүк ситиһиилэннилэр. Ол курдук муус устар ыйга Дьокуускайга ыытыллыбыт кикбоксиҥҥа Арассыыйаҕа бастыыр иһин күрэхтэһиигэ Дьокуускайдааҕы бырамыысыланнай техникум устудьуона ТИМОФЕЙ СИВЦЕВ  57 киилэҕэ дылы ыйааһыҥҥа тэҥнээҕин булбата, Арассыыйа чөмпүйүөнун үрдүк аатын ылла. Инньэ гынан дойду сүүмэрдэммит хамаандатыгар киирдэ.

Эдэр дьон олоххо ситиһиилээх буолалларыгар иитэр-үөрэтэр идэлээх дьон учууталлар, маастардар таһымнара үрдүк буолара эрэйиллэр. Техникум үлэһиттэрэ бэйэлэрин идэлэрин уһулуччу баһылаан өрөспүүбүлүкэ иһигэр эрэ буолбакка дойдуга ыытыллар күрэхтэргэ кыттыыны ылаллар.  Быйыл «2021 сыл бастын маастарын” аатын өрөспүүбүлүкэҕэ ЛЮБОВЬ ДОРОГУНОВА ылан бу күннэргэ Москуба куоракка Арассыыйа үрдүнэн ыытыллар производственнай үөрэхтээһин маастардарын күрэҕэр кытта барар чиэстэннэ. Любовь Ивановна өр сылларга күндү тааһы кырыылыыр идэҕэ көмүс ууһугар үөрэнэр оҕолору уһуйар. Өрөспүүбүлүкэҕэ “Ювелирное дело” кэмпитиэнсийэ экспиэрэ буолан, манна ыытыллар күрэхтэри сыл аайы салайар. Сыралаах, үрдүк таһымнаах  үлэтин сыаналаан быйыл “Арассыыйаҕа оҕону иитии уонна үөрэхтээһин бочуоттаах үлэһитин” бэлиэтинэн наҕараадаламмыта. Нуучча тылын уонна литературатын учуутала ОЛЬГА ЯКОВЛЕВА Кузбаастааҕы профессиональнай үөрэхтээһин институтун тэрийиитинэн ыытыллыбыт “Сыл бастын педагога” күрэххэ ситиһиилээхтик кытынна. Ольга Михайловна оҕолору нуучча литературатын сэргииллэрин араас ньыманан ситиһэр. Иккис сылын техникумҥа “Альтаир” диэн тыйаатыр студиятын салайан ыытар. Муус устарга буолбут “Арассыыйа устудьуоннарын сааһа” фестивальга бу студия кыттыылаахтара А.П.Платонов “Юшка” диэн айымньытынан туруоруллубут бостонуопкалара Лауреат үрдүк аатын ылан Арассыыйа таһымыгар кыттарга туоһу сурук ылбыттара.

Алтынньы ый саҥата дойду үрдүнэн үтүөҕэ-кэрэҕэ уһуйар учуутал аймах идэлээх күннэрэ бэлиэтэнэр. Бу сырдык ыраас күнү Улэ Дьоруойа Тараас Десяткин аатынан Дьокуускайдааҕы бырамыысыланнай техникум чуораан чугдаар тыаһынан, эдэр ыччат эрчимнээх күлүүтүнэн, таһаарыылаах үлэнэн үөрэ-көтө көрсөр.